Chlouse Abe im Hornusserhüttli Utzistorf
Samsti 6. Dezämber, dr strängscht Tag im Jahr füre Samichlous. D Routierfamilie vom Ämmital-Oberaargau trifft sich a däm spezielle Tag im Hornusserhüttli Utzistorf zum gmüetliche Chlouese Abe mit Fondue u Steak. Leider het dr Samichlous ke Zyt gha zum cho äs Bsüechli mache, aber är het für d Fabienne äs Seckli bim Präsident deponiert. Ja villich hätte die einte oder angere Chauffeure doch dr Bsuech vom Samichlous chli nötig gha u mau äs mahnends Wort möge vertrage. Hoffe doch, dass är sich nächst Jahr wieder cha Zyt näh u cha cho ineluege, wis da so zue u här geit, we me um jedes Bitzli Fondue kämpft..... Di 47 hungrige Gescht si vom Vorstand hervorragend betröit u bedient worde, so dass würkli gar niemer het müesse hungrig vom Tisch ga. Sogar mit Wiehnachtsgüetzli, Nussgipfle u ganz früsche Brätzeli isch ufgwartet worde. Ganz härzliche Dank au dene Spänder. Was wär doch dä Chloushöck ohni äs feins Kaffi mit chli öppis Süessem. Vili gueti u spannendi diskussione hets gä, sogar, wär muess häufe abwäsche..... aber da ja jetzt im Hüsli ä Abwäschmaschine isch, geit ja das viu schneuer u dr Vorstand het das säuber greglet. Mi isch no lang gmüetlich zäme ghöcklet u het über verschiedeni Sache diskutiert. Wos du scho bau i nöi Tag gange isch hei sich d Gescht afe verabschide u di letschte dörfe de aube no häufe putze u ufrume. Meischtens geit ds Abschlussbier lenger, aus ds Ufrume, aber das isch so Tradition. Ig wünsche öich immer gueti Fahrt u alles Guete.
Öii Webmasterin ds Lisi
