Spaghettiplausch 2024
Knapp 60 Personen, Kir, 17l Bolognese Sauce, 10l Carbonara Sauce, 6l Sauce a la Jacky, feine Desserts, gute Stimmung, tolle Gespräche, das si so d Fakte vom diesjährige Spaghettiplousch. Jetz no chli im Detail.
Am 13. April am haubi füfi het sich dr Vorstand im bim Drum in Kirchberg versammlet füre Spaghetti Plousch ds vorbereite. Dr Presi git grad hurti dr Arbeitsplan düre u när geits scho los. Jedes weiss was muess mache. Di knapp 60 Persone wei de ässe u aues mues parat si. Tische u Bänk i Saal, dr Shop ufboue, villich cha me ja de no öppis verchoufe? U d Chuchimannschaft het ou iri Arbeit.
Scho gli trudle di erschte i u mi git afe chlei Kir zum Apero. Ja di 17l Bolgnese, di 10l Carbonara u di 6l Sauce a la Jacky müesse no ufgwärmt wärde u d Spaghetti wärde säubverständlich früsch kochet vor Ort.
Jedes cha ussueche wases gärn möchti oder ou vo auem ha. Äs het gnue. Immer wieder gseht me dr eint oder ander mitem Täller zum Buffet ga, wüu si si haut scho guet u die Sauce möchti haut scho ou no probiere…..
Wo du würkli niemer me het Spaghetti wöue, isch ds Dessertbuffet ufboue worde. U ou da si kener Wünsch offe blibe, Mi het zwüsche Schoggicake, Rhabarberchueche, Cupcake u no vilem meh chönne usläse. We da öpper nüt gfunge het de weiss ig de auso ou nüt me. Feine Kaffi hets natürli ou gä drzue oder äs Tee wos lieber hei.
Mi het gueti Gspräch gfüert u het drüber diskutiert, dass me ja jetz scho wieder z viu het gässe, aber dass es haut mega fein isch gsi, u drum no einisch meh isch ga reiche.
Zu später Stunde, auso ziemli gnau aum 0.20 het dr Presi dr Schlüssu dräit im Drum. Aues isch putzt u ufgrumt gsi u jedes isch zfride hei gange. Ig danke aune vom Vorstand für die tolli Arbeit. Ig has gnosse, dass ig mau nume ha dörfe härehöckle, ässe u gniesse. Merci viumau.
No grad chli Wärbig i eigeter Sach, we dir no Föteli heit vo öiem Laschi, wo dr gärn mau uf dr Homepage möchtet ha, schicket die mir doch per Mail. Tue die gärn druflade.
Öii Webmasterin Lisi
