Chloushoeck
Chloushöck 2019
Am 7. Dez hets churz nach de vieri im Hornusserhüttli ds Utzistorf scho chli nach Wienachte gschmöckt. Glüewi, Chris, Mandarinli u Nüssli, das si unverkennlichi Zeiche, dass dr Chloushöck agseit isch. Dr Vorstand u d Froue si tatchräftig am vorberite, dass de aus parat isch für d Lüt u vorauem für d Ching. Die möge aube chum gwarte, bis es glöggelet vom Strässli här. U de isch är cho, dr Samichlous mit em Schmutzli u sim Eseli. Är het chli verspätig gha, aber i dere stränge Zyt muess är soo viu Ching bsueche, da tüe mir ihm das gärn verzeie u di 19 Chinderougepaar si glücklich, dass är ändlich da isch u si ihm dörfe ihres Värsli ufsäge u de no chli ds Eseli strichele. Ja dr Samichlous het für aui Zyt gha zum lose u o di vile schöne Zeichnige aluege. Är het de aber o für aui äs wunderschöns Seckli gha. Jedes Ching het eis dörfe mit nä. Sogar d Manne vom Vorstand hei das Jahr eis übercho. De hei die iri Arbeit o guet gmacht ungerem Jahr. Bravo Manne. När isches im Hüttli so richtig los gange. Aui hei Hunger gha u hei wöue ässe. Aber d Chuchimannschaft isch parat gsi u si hei aui Wünsch promt chönne erfülle, egal ob mit Fondue oder mit Steak. Gäu Küsu. Nachem ässe hets immer viu Dessert. Äs het immer so gueti Seelene wo di Chauffeurehärz tüe erfröie u öppis bache. De chame zum Kaffi aube grad useläse, was me da so gärn hät. Glii mau si di erschte Chinderöigli chlii u müed worde u die erschte Gescht hei sich ufe Heiwäg gmacht. Die wo kener chline Ching me hei, hei no chli lenger chönne blibe höckle u mi het no lang brichtet u glachet. Wo d Uhr du scho morn zeigt het, hei sich o di letschte Routierler ufe Heiwäg gmacht u dr Vorstand het ds Hüttli no ufgrumt u putzt. Äs isch ume mau ä guete u glungne Chlousabe gsi.
Öies Lisi
